कैलाली / प्रतिनिधि सभा निर्वाचनका लागि कैलालीका पाँच निर्वाचन क्षेत्रबाट ७८ जनाले उम्मेदवारी दर्ता गरेका छन् ।
मनोनयन दर्ता प्रक्रिया सकिँदै गर्दा पाँच क्षेत्रमा पहिले निर्वाचित भइसकेका नेताहरू पुनः चुनावी मैदानमा उत्रिएका छन् । विभिन्न राजनीतिक दल तथा स्वतन्त्रतर्फबाट गरी विगतमा संसद्मा पुगिसकेका उम्मेदवारहरू यसपटक पनि चुनावमा होमिएका हुन् ।
निर्वाचन आयोगले सार्वजनिक गरेको विवरणअनुसार सबै पार्टीका उम्मेदवारहरूले मनोनयन दर्ता गराइसकेका छन् । जस अनुसार क्षेत्र नं १ बाट ६ जना स्वतन्त्र उम्मेदवारसहित १९ जनाको उम्मेदवारी परेको छ । जसमध्ये महिला उम्मेदवार ३ जना मात्र छन् ।
क्षेत्र नं २ मा ३ जना स्वतन्त्र गरि १६ जनाले उम्मेदवारी दर्ता गराएका छन् । यो क्षेत्रमा पनि २ जना मात्रै महिला उम्मेदवार रहेका छन् । क्षेत्र नं. ३ मा स्वतन्त्र उम्मेदवारी परेको छैन । पार्टीबाट ११ जनाको उम्मेदवारी परेको यो क्षेत्रमा पनि २ जना मात्रै महिला उम्मेदवार छन् ।
यस्तै क्षेत्र नं ४ मा १ जना स्वतन्त्र उम्मेदवारसहित १७ जनाले मनोनयन दर्ता गराए । जसमा महिला १ जना मात्रै छन् । यता क्षेत्र नं ५ मा ३ जना स्वतन्त्र गरी १६ जनाको उम्मेदवारी दर्ता हुँदा महिला उम्मेदवार ३ जना रहेका छन् ।
कैलाली क्षेत्र नं ५ मा नेपाली कांग्रेसबाट नरनारायण शाह, नेपाली कम्युनिष्ट पार्टीबाट प्रेम आलेबीच रोचक प्रतिस्पर्धा हुने देखिएको छ । यहाँ रास्वपाबाट आनन्दबहादुर चन्द, मितेरी पार्टी नेपालबाट राधिकाकुमारी कार्की, प्यारेलाल राना र जनकराज पाठक स्वतन्त्रबाट, राप्रपाबाट रोशन शाही लगायतले मनोनयन दर्ता गराएका छन् ।
मनोनयन दर्ता विवरण हेर्दा महिला उम्मेदवारको संख्या एकदमै कम देखिएको छ । केही दलबाट महिलाले उम्मेदवारी दर्ता गराए पनि समग्रमा पुरुष उम्मेदवारकै वर्चस्व छ । पाँच वटै निर्वाचन क्षेत्र गरी जम्मा ११ जना महिलाको उम्मेदवारी परेको छ । राजनीतिक क्षेत्रमा समावेशिताको कुरा पटक–पटक उठे पनि प्रत्यक्ष निर्वाचनमा महिलाको उपस्थिति अझै कमजोर रहेको आजको मनोनयन दर्ताले देखाएको छ ।
मनोनयन दर्ता सूचीमा प्रमुख दलहरूका साथै केही साना दल र स्वतन्त्र उम्मेदवारको उपस्थिति पनि देखिन्छ । दलहरूले यसपटक पनि जित सुनिश्चित गर्ने उद्देश्यले पहिल्यै परीक्षण भइसकेका, संगठनमा पकड भएका र मतदातामाझ परिचित अनुहारलाई अघि सारेका छन् । दलभित्र नयाँ नेतृत्व विकासको चर्चा भए पनि प्रत्यक्ष निर्वाचनमा कैलालीमा त्यसको प्रभाव नगन्य देखिएको छ ।
समाचार 