राजापुरमा चितुवाको आक्रमणबाट बुधबार एक बालकको मृत्यु भएको छ । बर्दिया जिल्ला राजापुर नगरपालिका–१० कालाबन्जरका ६ वर्षीय आदित्य चौधरीको चितुवाको आक्रमणबाट बुधबार साँझ मृत्यु भएको हो ।
घर आँगनमा खेलिरहेको अवस्थामा चितुवाले उनलाई आक्रमण गरी घाइते बनाएको थियो । उपचारको लागि तत्काल बर्दिया अस्पताल पुर्याउँदा चिकित्सकले बालकलाई मृत घोषणा गरेको जिल्ला प्रहरी कार्यालयका डिएसपी प्रमेश विष्टले बताए ।
‘चितुवाले सुरुमा बालकलाई आक्रमण गरेर घाइते बनायो,’ डिएसपी विष्टले भने, ‘चितुवालाई भगाउन गएका अन्य तीनजनालाई पनि आक्रमण गरी घाइते बनायो ।’ उनका अनुसार राजापुर नगरपालिका–१० कालाबन्जरका ४१ वर्षीय कृतिमान थारु, ४१ वर्षीय धनीराम थारु र ३८ वर्षीय श्यामलाल थारु घाइते भएका छन् । उनीहरूको नेपालगन्जस्थित उपचार भइरहेको र अवस्था सामान्य रहेको जनाइएको छ ।
यस्तै, बुधबार साँझ ५ बजेतिरै गुलरिया नगरपालिका–२ संगमवस्तीका ५० वर्षीय नसरुदिन गुज्जरलाई चितुवाले आक्रमण गरी घाइते बनाएको छ । गुज्जर र उनकी श्रीमति खेतमा घाँस काट्न गएको बेला चितुवाले आक्रमण गरेको हो । गुज्जरकी श्रीमतिले होहल्ला गर्दा चितुवा भागेको थियो । गुज्जरको घाँटी र कम्मरमा चोट लागेको छ । उनको बर्दिया अस्पतालमा उपचार भइरहेको डिएसपी विष्टले जानकारी दिए ।
समाचार 