काठमाडौँ — नेकपा एकीकृत समाजवादी फुटको संघारमा पुगेको छ । शुक्रबार केन्द्रीय कमिटीले माओवादी केन्द्रसँग एकता गर्ने नीतिगत निर्णय गरेपछि त्यसमा असहमति जनाउँदै वरिष्ठ नेता झलनाथ खनाल, महासचिव घनश्याम भुसाललगायत नेताले शनिबार छुट्टै भेला गरेका छन् ।
महासचिव भुसालको संयोजकत्वमा ‘नेकपा एकीकृत समाजवादी (भुसाल) समूह’ गठन गर्ने तयारी भएको एक नेताले बताए । अध्यक्ष माधवकुमार नेपालको नेतृत्वमा संस्थापत पक्षले माओवादी केन्द्रसँग एकता गर्ने तयारी गरिरहेका बेला भुसाल समूहले पार्टी पुनर्गठन गर्ने भन्दै आफ्नो पक्षको केन्द्रीय कमिटी बैठक बोलाएका छन् ।
भुसाल समूहका नेता दामोदर अर्याल बैठकले एकीकृत समाजवादीको पुनर्गठनको पक्षमा उभिन आग्रह गर्ने बताए । ‘एकीकृत समाजवादीको पुनर्गठनको पक्षमा उभिन हामी सम्पूर्ण नेता तथा कार्यकर्तालाई आग्रह गर्छौं,’ उनले अन्य वामपन्थी दलभित्र पनि पुनर्गठन गर्न आग्रह गर्ने बताए, ‘अन्य वाम पार्टीलाई पुनर्गठन गर्न आह्वान गर्छौं ।’
बैठकमा खनाल, भुसाल, उपाध्यक्ष घनेन्द्र बस्नेत, उपमहासचिव विजय पौडेल, स्थायी कमिटी सदस्य जीवनराम श्रेष्ठ, रामकुमारी झाँक्री, हरि पराजुलीलगायत पूर्वसांसदहरु सहभागी भएको उनले बताए । समाजवादीको ४५५ केन्द्रीय सदस्यमध्ये १५८ ले पुनर्गठनको पक्षमा उभिने जानकारी दिएको उनको दाबी छ ।
माओवादीसँग एकताबारे विवाद भइरहेका बेला विपक्षमा उभिएका नेताहरु एमालेसँग संवादमा रहेका छन् । शुक्रबार नै एमाले अध्यक्ष ओलीले नेकपा एसका असन्तुष्ट नेतालाई लक्षित गरी शुक्रबार घर फर्कन आह्वान गरेका छन् । खनाल, भुसाल, झाँक्रीसँग एमालेका नेताहरुले संवाद सुरु गरिसकेका छन् । ‘नेकपा एसका नेताहरुसँग अनौपचारिक संवाद सुरु भइसकेको छ । अध्यक्ष नेपाल पक्ष माओवादीतिर गए असहमत पक्ष एमालेतिर आउनेबारे संवाद हुँदैछ,’ एमालेका एक नेताले भने । ओलीको निर्देशनमा एमालेका नेताहरुले एससँग कुराकानी सुरु गरेका छन् । एसकै धेरै नेताहरुले माओवादीसँग एकता हुनुलाई पार्टी अस्तित्व झन् संकटमा पर्ने विश्लेषण सुरु गरेका छन् । नेकपा एसको विभाजनपछि नेता तथा कार्यकर्ताहरु एमाले र माओवादीतिर एकतामा जाने छन् ।
महासचिव भुसाल भने वाम ध्रुवीकरणका लागि कतै नगएर युवाको नेतृत्वमा छुट्टै ध्रुवीकरण गर्ने पक्षमा छन् । पहिलो पुस्ताबाट वाम एकताभन्दा व्यक्तिगत स्वार्थ पूरा गर्ने र त्यसले मुलुकमा आशा जगाउन नसक्ने उनको बुझाइ छ ।
एमाले अध्यक्ष ओलीले घर फर्कन आह्वान गरेपछि सैद्धान्तिक र राजनीतिक आधारमा सहमति हुनुपर्ने नेकपा एसका वरिष्ठ नेता खनालले जनताको बहुदलीय जनवाद छाडेर नेपाली विशेषताको समाजवाद हुनुपर्ने, सम्मानित पद पाउनुपर्ने लगायत सर्त अघि सारेका छन् । तर एमालेका एक नेताका अनुसार खनाललाई एमालेमा खनाल र महासचिव भुसाललाई भित्र्याउनेबारे ओली सकारात्मक छैनन् । एसकी चर्चित नेतृ रामकुमारी झाँक्री एमाले नेताहरुसँग सघन वार्तामा रहेकी छन् ।
२ भदौ २०७८ मा एमालेबाट विभाजन भई माधवकुमार नेपालको नेतृत्वमा नेकपा एकीकृत समाजवादी गठन भएको थियो । २०८१ असारमा भएको महाधिवेशनले नेपाललाई अध्यक्ष पदमा चयन गरेको थियो । २०७९ को आमनिर्वाचनमा प्रतिनिधिसभामा १० सिट ल्याए पनि राष्ट्रिय पार्टी बन्न सकेन ।
समाचार 
