कप्तान अशोक धामी र दर्श सुनारको शतकीय साझेदारीको मद्दतमा नेपाल एसीसी यू–१९ प्रिमियर कप क्रिकेटको सेमिफाइनलमा पुगेको छ । यूएईमा भइरहेको प्रतियोगितामा नेपालले बिहीबार हङकङलाई १ सय १९ रनले पराजित गर्यो ।
२ सय ७१ रनको लक्ष्य लिएर आएको हङकङ अजमान स्थित सेभेन ड्रिस्ट्रिक ग्राउन्ड २ मा ४०.५ ओभरमा १ सय ५१ रनमा अलआउट भयो । नेपाल यस खेल जितेर समूह ‘ए’ को विजेता बनी सेमिफाइनलमा पुगेको छ । नेपालले सोमबार साउदी अरेबियालाई ८ विकेटले पराजित गरेको थियो । नेपालले सेमिफाइनलमा मलेसियासँग खेल्ने छ । अर्को सेमिफाइनल यूएई र ओमानका बीच हुनेछ । दुवै सेमिफाइनल शनिबार हुनेछ ।
नेपालबाट अपराजित पौडेलले ४ र अशोकले ३ विकेट लिए । अपराजितले १० ओभरमा २ मेडन राख्दै ३१ र अशोकले १० ओभरमा २ मेडन राख्दै २९ रन खर्चे । दयानन्द मण्डल, सुशीलबहादुर रावल र रोशन विश्वकर्माले १–१ विकेट लिए । हङकङका कप्तान शिव माथुरले सर्वाधिक ३० रन बनाए । उनले २९ बल खेली ३ चौका र २ छक्का प्रहार गरे । ओपनर जुड ली २६ बल खेली ३ चौका प्रहार गरी २२, रेयान्श शर्मा १८, अब्दुल समाद खान १९ र आरेज दारले १५ रन बनाए ।
यसअघि टस जितेर ब्याटिङ रोजेको नेपालले बिहीबार निर्धारित ५० ओभरमा ७ विकेट गुमाई २ सय ७० रन बनाएको हो । अशोक र दर्शको प्रयासमा नेपालले अन्तिम ५ ओभरमा ६८ रन जोडेको थियो । यी दुईले सातौँ विकेटमा १ सय ८ रनको साझेदारी गरे । अशोक इनिङ्सको अन्तिम बलमा ७३ रन बनाई आउट भए । उनले ५१ बल खेली ३ चौका र ४ छक्का प्रहार गरे । दर्श ५८ बलमा अविजित ४५ रन बनाए । उनले ३ चौका प्रहार गरे । ओपनरद्वय नीरजकुमार यादव २२ र वंश क्षेत्री २४ रनमा आउट भए । नीरजले २० बल खेली ३ चौका र वंशले ३४ बल खेली २ चौका प्रहार गरे । निश्चल क्षेत्री ३ रनमै आउट भए ।
सिब्रिन श्रेष्ठले ५९ बल खेली १ चौकासहित २५ रन बनाए । दिलशाद अलीले ५० बल खेली ३२ रन जोडे । रोहन विश्वकर्मा २१ बल खेली २ चौका र १ छक्का प्रहार गरी २२ रनमा आउट भएपछि अशोक र दर्शको जोडिले जमेर ब्याटिङ गरेका थिए । हङकङका अभिमन्यु गणेशन र डानियल मापले २–२ विकेट लिए ।
समाचार 
