नेपालका विभिन्न भेगमा परम्परागत रूपमा बनाइने सिन्की केवल स्वादका लागि मात्र होइन, स्वास्थ्यका दृष्टिले पनि निकै लाभदायक मानिन्छ। मुला अथवा कुनै सागलाई खाल्डोमा दबाएर किण्वन गरेर तयार पारिने यो परिकारमा प्राकृतिक प्रोबायोटिक गुण हुन्छ, जसले पाचन प्रणालीलाई बलियो बनाउन सहयोग गर्छ।
सिन्कीमा पाइने प्रोबायोटिक तत्वले आन्द्रामा लाभदायी ब्याक्टेरिया बढाउँछ। यसले कब्जियत, अपच तथा पेट फुल्ने समस्या कम गर्छ। साथै, किण्वन प्रक्रियाबाट भिटामिन–B, भिटामिन–C र एन्टिअक्सिडेन्ट तत्व प्राप्त हुने भएकाले शरीरको प्रतिरक्षा प्रणालीलाई बलियो बनाउन मद्दत पुर्याउँछ।
यसमा पाइने क्याल्सियम, फलाम र पोटासियम जस्ता खनिज पदार्थले हड्डी र जोर्नीलाई मजबुत बनाउन भूमिका खेल्छन्। जोर्नी दुख्ने वा बाथरोग भएका व्यक्तिहरूलाई पनि यसबाट फाइदा पुग्ने जनविश्वास छ। त्यस्तै, फर्मेन्टेड खानाले रक्तसञ्चारलाई सुदृढ बनाउने र खराब कोलेस्ट्रोल घटाउने भएकाले मुटु स्वास्थ्यका लागि पनि लाभदायी हुन्छ।
सिन्कीमा हुने प्रशस्त फाइबरले मधुमेह नियन्त्रणमा मद्दत गर्छ। यसले रक्तमा चिनीको स्तरलाई स्थिर राख्न सहयोग गर्ने भएकाले मधुमेह भएका व्यक्तिहरूका लागि उपयोगी हुन्छ। साथै, कम क्यालोरी र बढी फाइबर भएकाले तौल नियन्त्रण वा घटाउन चाहनेका लागि पनि यो उपयुक्त भोजन मानिन्छ।
यसमा पाइने प्राकृतिक एन्टिअक्सिडेन्टले शरीरमा हुने सूजन (inflammation) कम गर्छ र उमेरसँगै आउने विभिन्न स्वास्थ्य समस्या घटाउन सहयोग पुर्याउँछ। तर, अत्यधिक अमिलो हुने भएकाले ग्यास्ट्रिक वा अल्सर भएका व्यक्तिले भने सिन्की सावधानीपूर्वक वा सीमित मात्रामा सेवन गर्नुपर्छ।
समाचार 
