काठमाडौं । प्रधानमन्त्री बालेन्द्र शाहले नेपालको वर्तमान विद्युत् वितरण पूर्वाधार तत्काल पूर्ण रूपमा विद्युतीय जीवनशैली धान्न सक्षम नरहेको बताएका छन्।

प्रतिनिधिसभामा सम्बोधन गर्दै प्रधानमन्त्री शाहले देशभरका नागरिकले एकैपटक विद्युतीय चुल्हो, इन्डक्सन तथा अन्य विद्युतीय उपकरणको व्यापक प्रयोग गर्न थालेमा विद्युत् प्रणालीमाथि अत्यधिक दबाब पर्ने बताए। उनले हालको अवस्थामा ट्रान्सफर्मर, सबस्टेसन तथा वितरण सञ्जालको क्षमता पर्याप्त नभएकाले पूर्वाधार विस्तार र स्तरोन्नति आवश्यक रहेको उल्लेख गरे।

प्रधानमन्त्री शाहका अनुसार नेपालले विद्युत् उत्पादनमा उल्लेखनीय प्रगति गरे पनि प्रसारण र वितरण प्रणालीलाई सोही अनुपातमा सुदृढ गर्न बाँकी छ। “उत्पादन क्षमता बढ्दै गएको छ, तर वितरण प्रणालीलाई समयानुकूल आधुनिकीकरण नगरेसम्म विद्युत्को व्यापक उपयोग सम्भव हुँदैन,” उनले भने।

उनले विद्युत्मा लगाइएको ५ प्रतिशत मूल्य अभिवृद्धि कर (भ्याट) पनि पूर्वाधार विकासका लागि आवश्यक स्रोत जुटाउने उद्देश्यले लागू गरिएको स्पष्ट पारे। उक्त रकम ट्रान्सफर्मर अपग्रेड, वितरण लाइनको क्षमता विस्तार तथा अन्य विद्युत् पूर्वाधार सुदृढीकरणका काममा खर्च गरिने उनको भनाइ छ।

विद्युतीय सवारीसाधन, इन्डक्सन चुल्हो तथा अन्य विद्युतीय उपकरणको प्रयोग बढ्दै गएकाले वितरण प्रणालीलाई पनि सोहीअनुसार सक्षम बनाउनु आवश्यक रहेको प्रधानमन्त्री शाहले बताए। उनले विद्युत्को दीर्घकालीन र प्रभावकारी उपयोगका लागि पूर्वाधार विकासमा निरन्तर लगानी आवश्यक रहेकोमा जोड दिए।