काठमाडौंको कीर्तिपुर नगरपालिका–१० सुन्दरीघाटस्थित राधास्वामी सुकुम्बासी होल्डिङ सेन्टरमा गएराति बागमती नदीमा आएको बाढी पसेपछि त्यहाँ बसिरहेका सुकुम्बासी प्रभावित भएका छन्।

काठमाडौं प्रहरीका अनुसार राति करिब १ बजे बाढी सेन्टरभित्र पसेपछि ५४ जनालाई उद्धार गरी त्रिभुवन विश्वविद्यालय परिसरस्थित स्मृति भवनमा सारिएको छ। बाढीका कारण सुकुम्बासीहरूको लत्ताकपडा र खाद्यान्न भिजेको छ। होल्डिङ सेन्टरमा रहेका १५४ जनामध्ये ६ जना होस्टलमा बसेका छन् भने ९४ जनाले सेन्टरकै सुरक्षित भागमा बस्ने निर्णय गरेका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सूचना पाएलगत्तै नेपाल प्रहरी र सशस्त्र प्रहरीको संयुक्त ६० सदस्यीय टोली उद्धारमा खटिएको थियो । प्राधिकरणले प्रभावितहरूका लागि खाना, पिउने पानी र अन्य आवश्यक राहत सामग्रीको व्यवस्था भइरहेको जनाएको छ।