धनगढी / कैलाली प्रहरीले प्रहरी नायव निरीक्षक शुशिल चन्द ठकुरी सहित अन्य ३ जना प्रहरी कर्मचारीलाई नगद पुरस्कार सहित सम्मान गरेको छ ।

सम्मानित हुनेहरूमा प्रहरी सहायक हवल्दारद्वय महेश बहादुर चन्द र सन्तोष महरा तथा प्रहरी जवान हर्क बहादुर बोहरा रहेका छन्। उनीहरूको सक्रियतामा कैलारी–९ का राजकुमार रानाको शव जेठ २४ गते त्रिवेणी घाटमा फेला परेको घटनाको अनुसन्धानमा महत्वपूर्ण सहयोग पुगेको प्रहरीले जनाएको छ।

कैलाली प्रहरीका प्रवक्ता डीएसपी योगेन्द्र तिमिल्सिनाका अनुसार प्रारम्भिक अनुसन्धानमा रानामाथि कुटपिट गरी हत्या गरिएको र त्यसपछि शव मोहना नदी किनारमा फालिएको देखिएको थियोे । घटनामा संलग्न रहेको आरोपमा धनगढी उपमहानगरपालिका–८ का ६० वर्षीय बम्मन राना र ५८ वर्षीया भँगु राना र गिता रानालाई पक्राउ गरिएको थियोे । गिता उनिहरुको छोरी हुन् ।

उनीहरूलाई कर्तव्य ज्यान मुद्दामा म्याद थप गरी अनुसन्धान भइरहेको छ भने अन्य दुई जना फरार रहेको कैलाली प्रहरीले जनाएको छ।
फरार व्यक्तिहरूको खोजी कार्य जारी रहेको जिल्ला प्रहरी कार्यालय कैलालीले जनाएको छ।