सत्ति / कैलालीको जानकी गाउँपालिकाको १३ औ सभा सम्पन्न भएको छ । गाउँ सभामा उपाध्यक्ष लालमतिदेवी कठरियाले प्रस्तुत गर्नुभएको ४४ आयोजनाको ८५ लाख ६० हजार रुपियाँ बजेट संशोधन प्रस्ताब पारित गरेको छ भने गाउँपालिकाका विगत छ महिनामा विभिन्न कार्यपालिकाका बैठकका निर्णयले गरेको ६२ लाख रुपियाँ खर्च अनुमोदन गरेको छ । 
सभाले पालिकाको जल उपयोग गुरुयोजना २०८० र पाँच सदस्यीय लेखासमिति अनुमोदन गरेको छ ।
सभामा बोल्दै वडा नं. ३ का वडा अध्यक्ष सुरेश चौधरीले महिला स्वास्थ्य स्वयम् सेविकाको सेवा सुविधाको बारेमा कार्यपालिकामा छलफल भए पनि सभामा समावेस नभएकोले संशोधन गर्न आग्रह गरे ।
वडा नं. ७ का वडा अध्यक्ष कमल महतोले गाउँपालिकाको १२ औ सभाले पारित गरि बड्घर चिराकीको लागि परिचय पत्रको व्यवस्था गर्ने भनिए पनि अहिले साे कुरा नआएको बताएका थिए ।
वडा नं. ५ का वडा अध्यक्ष भिमबहादुर थारुले छाडा पशुका बारेमा योजना तथा कार्यक्रम समावेश नभएकाले बताए । गाउँसभा सदस्यबाट आएको भनाइलाई गाउँपालिका अध्यक्ष गणेश चौधरीले सम्बोधन गरेका थिए ।
विविध विषयमा बोल्दै गाउँसभा सदस्यहरुले सभामा विभिन्न विषयमा धारणा राखेका थिए । सभाका सदस्यका बिचारलाई गाउँपालिका अध्यक्ष गणेश चौधरी र प्रमुख प्रशासकीय अधिकृत आशीष चौधरीले सम्वोधन गरेका थिए ।
समाचार 
