सुदूरपश्चिम प्रदेशका मुख्यमन्त्री दीर्घ सोडारीले विश्वासको मत लिने कार्यसूची रहेको प्रदेशसभा बैठक अन्ततः स्थगित भएको छ । 
मुख्यमन्त्री सोडारीले विश्वासको मत लिने प्रायोजनका लागि शुक्रबार बोलाइएको बैठक स्थगित गरिएको छ ।
सभामुख भीमबहादुर भण्डारीले शुक्रबार प्रदेशसभा बैठक नहुने गरी स्थगित भएको जानकारी दिए ।
विश्वासको मतका लागि हतारमा बैठक आह्वान गरिएकाले तत्काल मुख्यमन्त्री सोडारीलाई विश्वासको मत दिन नसक्ने अडान एमालेले लिएको छ । एमालेले विश्वासको मत नदिएको अवस्थामा बहुमत नपुग्ने भएपछि विश्वासको मतको लागि शुक्रबार आह्वान गरिएको बैठक स्थगित गरिएको छ ।
एमाले सुदूरपश्चिम प्रदेश संसदीय दलका नेता राजेन्द्रसिंह रावलले शुक्रबार विश्वासको मत नदिने अडान लिएका छन् ।
संसदीय दलको कार्यालयमा सञ्चारकर्मीलाई प्रतिक्रिया दिँदै उनले मुख्यमन्त्री सोडारीले सल्लाह नगरेर हतारमा विश्वासको मत लिन खोजेको आरोप लगाए । ‘गठबन्धनको सरकार बनाउने कुरा हो । यहाँ हतार गर्नुपर्ने बेला छैन । बझाङको निर्वाचन भर्खर सकिएको छ । उम्मेदवारको बुवा बित्नुभएको १३ दिन पनि पुगेको छैन । किन हतार गर्नु ?’ उनले भने ।
समाचार 
