जिल्ला प्रशासन कार्यालय कैलालीले मर्यादित तरिकाले होली पर्व मनाउन आग्रह गरेको छ। प्रशासनले सार्वजनिक सूचना जारी गरेर जिल्ला वासीलाई मर्यादित तरिकाले होली पर्व मनाउन आग्रह गरेको हो।
रङ्गको पर्व होली तराईमा चैत १ गते मनाइने भए पनि होलीको रमझम सुरु भइसकेको छ।
प्रशासनले होली मनाउने नाममा अवाञ्छित गतिविधि नगर्न सबैलाई आग्रह गरेको छ। त्यस्तो गरेको पाइएमा प्रचलित कानुन अनुसार कारबाही गरिने सहायक प्रमुख जिल्ला अधिकारी किरण जोशीद्वारा जारी सूचनामा उल्लेख छ। प्रशासनले जथाभाबी रङ लगाउने, कोही कसैको इच्छाविपरित हानिकारक वस्तु दल्ने कार्य नगर्न आग्रह गरेको छ।
प्लास्टिकजन्य लोला तथा पानी छ्याप्ने, मादक पदार्थ सेवन गरी सवारी चलाउने, बाटोमा हिँड्ने व्यक्तिलाई अभद्र व्यवहार गर्ने, नसालु पदार्थ सेवन गरी सार्वजनिक स्थलमा नाचगान तथा होहल्ला नगर्न प्रशासनको आग्रह छ। डोरीले बाटो छेकेर पैसा उठाउने, दुःख हैरानी दिने, बाटो अवरोध गरी सवारी साधनबाट रकम असुल्ने जस्ता सार्वजनिक शान्ति, सुव्यवस्थामा खलल पुर्याउने खालका कानुन विपरीतका क्रियाकलाप नगर्न र नगराउन प्रशासनले आग्रह गरेको छ ।
साथै, राति ९ बजेसम्ममात्रै सभ्य, मर्यादित, हर्षोल्लासपूर्वक पर्व मनाउन अपिल गरिएको छ। कोही कसैले कानुनको बर्खिलाप हुने क्रियाकलाप गरेको पाइएमा कानुन बमोजिम सजाय हुने सूचनामा उल्लेख छ ।
समाचार 
