यतिबेला टिकापुर नगरपालिका फेरि चर्चामा छ । तालाबन्दीले गर्दा । लोकतन्त्रमा आफ्नो मत जाहेर गर्ने ,आलोचना गर्ने , शान्तिपूर्ण अभियान चलाउने, सडकमा पुग्ने, प्रदर्शन गर्ने वा आफ्ना एजेन्डा प्रस्तुत गर्ने विषय स्वाभाविक हो । अहिले टिकापुर नगरपालिकामा तालाबन्दी दुई हप्ता बढी देखि भएको छ ।
एकपक्ष अर्को पक्ष बिच संवादको स्थिति शुन्य छ । यसले लोकतन्त्रको सबलीकरण हुन्छ कि आराेप प्रत्यारोप र प्रतिक्रियाको राजनीति मात्रै ? आफ्नो एजेन्डालाई शान्तिपूर्ण ढंगले उठाउने अधिकारलाई नगर प्रमुखले सम्मान गर्नुपर्छ । यो एजेन्डामा मात्रै होइन अन्यका हकमा पनि यही तर्क लागू हुन्छ ।
अहिले नगरपालिकामा भएको यो चुनौती सैद्धान्तिक होइन, व्यवहारिक हो । जसको जवाफ जवाफदेहिताबाट दिनुपर्छ । आफूभित्र लोकतन्त्र, गणतन्त्र वा संघीयता फलाउन र फुलाउन नसक्नेले संवाद गर्ने वातावरण नगरेर विरोधमा मात्र उत्रिएर म मात्रै विकासकाे संवाहक हुँ भन्नु विरोधाभासपूर्ण हो ।
अब प्रतिकार होइन, जवाफदेहिता सहित संवादमा बस्नुपर्छ । यदी नगरको हितै नै चाहेको हो भने नगरपालिका तालाबन्दी भएको यतिका हप्ता हुँदा पनि ,जनतालाई सास्ती हुँदा पक्ष र विपक्ष बिच खै समाधानको लागि समन्वय र पहल भएको ?
तालाबन्दी गर्ने पक्षको माग कसरी सम्बाेधन गर्ने ,के गरेर हुन्छ, कुन शुत्र प्रयोग गरेर हुन्छ ताला खुलाउन तर्फ लाग्नुको सट्टा बाहिरै अस्थायी कक्ष बनाएर कतिञ्जेल बस्ने हो । नगरप्रमुखको नेतृत्व प्रभावकारी हुनका लागि केवल उनले मात्र निर्णय गर्नुपर्ने कुरा होइन, सबै पक्षसँग मिलेर, समन्वय र सहकार्यमा काम गर्नुपर्छ।
नगरवासिको भलो सराेकारवालाहरुकाे सहकार्य बाट मात्रै नगरपालिकाको विकास सम्भव छ ।
नगरप्रमुख ,कार्यपालिका ,कर्मचारी र नगरवासिको संयुक्त प्रयासले मात्र नगरपालिकामा सकारात्मक परिवर्तन ल्याउन सक्छ अझै भनौं नगरमा विकास र सुशासन कायम हुन्छ भन्ने कुरा नगरप्रमुखले भुल्नु हुँदैन ।
नगरप्रमुखकाे पदमा रहेर जनताको सेवा गर्ने जिम्मेवारी पाएका नगरप्रमुखको दायित्व भनेको समाजका हरेक क्षेत्रमा विकास र सुधार ल्याउनु हो। तर अहिले टिकापुर नगरपालिकामा नगरप्रमुखले जिम्मेवार भूमिका निर्वाह नगरी, अनावश्यक बाटो अपनाएको देखिन्छ, यसले नगरपालिकामा नकारात्मक असर पुर्याउँछ । दुई पक्षको यो भाले जुधाइले नगरवासि नागरिक हाँस्छन् र हाँसिरहेका पनि छन ।
यो निकास विनाको ढिलाइले नगरको काममा निष्क्रियता र अव्यवस्था ल्याउँछ। यसले नगरपालिकाका महत्वपूर्ण योजनाहरू र प्रगतिको गति सुस्त पार्छ। जसका कारण नगरवासीको जीवनमा प्रत्यक्ष असर पर्दछ र यसले गर्दा नगर सुधारका लागी बनाइएका योजनाहरू असफल हुन्छन । यसले नगरपालिकाको छविमा नकारात्मक असर पार्दै, जनविश्वासलाई समेत कमजोर बनाउँछ।
त्यसैले, नगरप्रमुखले जुँगाकाे लडाइँ होइन वास्तविक स्थितिको मूल्यांकन गरेर सही निर्णय लिनु महत्त्वपूर्ण छ। यसले नगरप्रमुखलाई थप सफल बनाउँछ र नगरवासीको विश्वास जित्नमा मद्दत पुर्याउँछ। वेराेजगारि,बेथिति महंगि ,भ्रष्टाचारका कारण एकातिर जनता विस्फोटनको सँघारमा छन् । कसैलाई पाखा लगाएर, आरोप प्रत्यारोप गरेर, खेदेर होइन एउटै टेबलमा बस र निष्कर्ष निकाल, निकास देऊ, जग नहँसाउ ! पानी माथिको ओभानो बन्ने दुष्प्रयास कसैले नगर , मनन गर ।
देश काल परिस्थिति हेर, माटो हेर, आआफ्ना गल्ती कमजोरीहरू स्वीकार गर । एकै ठाउँमा बसेर आत्माआलोचना गर । अहिले पाएकाे पदकाे भरपुर सहि उपयाेग गर प्रयोगशाला मात्र नबनाऊ । नगरवासिका लागि एउटा नयाँ मोडेल, नयाँ डिजाइनमा जाऊ, समय बलवान हुन्छ । समयसँग खेलबाड नगर । एकता कायम गर, आगो नियन्त्रण गर । आगे जो मर्जी !
समाचार 
