सन्दर्भ डेस्क ,सत्ति / गैर आवासीय नेपालीको सहयोगमा सुदुर पश्चिम प्रदेशका लागि खरिद गरिएको एनआरएनए को दोस्रो ‘मोबाइल ब्लड बैंक बस’ आज हस्तान्तरण गरिएको छ । धनगढीमा एक कार्यक्रमका बीच बस हस्तान्तरण गरिएको हो । 
उक्त बस संघका अध्यक्ष कुमार पन्तले धनगढी उपमहानगरपालिकाका मेयर नृप वड मार्फत रेडक्रस कैलालीका अध्यक्ष उत्तम जोशीलाई हस्तान्तरण गरेका थिए ।
कार्यक्रममा एनआरएनएका संरक्षक जीवा लामिछाने, सल्लाहकार कुल आचार्य, उपाध्यक्ष डा. बद्री केसी, महासचिव डा. हेमराज शर्मा, प्रवक्ता डिवी क्षेत्री, मानार्थ सदस्य धर्मराज अधिकारी र शनिकुमार ओली लगायत एनआरएन अभियन्ता सहभागी रहेका थिए । 
बसको लागत ६० लाख हाराहारीमा भए पनि गैर आवासीय नेपालीबाट ४८ लाख संकलन भएको थियो । बाँकि रकम एनआरएनएको आइसिसीको खाताबाट पछि ब्यहोर्ने गरि खरिद गरिएको जनाइएको छ ।
‘मोबाइल ब्लड बस’ परियोजनामा हालका सचिव गौरीराज जोशी संयोजक र अफ्रिकाबासी आइसिसी पूर्वकोषाध्यक्ष हिक्मत थापा सहसंयोजक थिए । परियोजनाका लागि सुदुर पश्चिमेली समाज अन्तर्राष्ट्रिय समिती, सुदुरपश्चिम समाज जापान, एनआरएनए अमेरिका, अस्ट्रेलिया , कोरिया, केन्या, सेसल्स, युगान्डा, जापान, क्यानडा, नाइजेरिया, साइप्रस, जाम्बिया, न्युजिल्यान्ड, नेदरल्यान्ड, घाना, जाम्बिया, सुदुर पश्चिम समाज अमेरिका, टेक्सास अमेरिका, कोरिया, भिक्टोरिया अस्ट्रेलिया, सिडनी अस्ट्रेलिया र बेलायत, एनआरएन महिला समिती युरोप, अन्तर्राष्ट्रिय ब्लड डोनर्स एसाेसियसन , ह्युमानिटी फाउन्डेसन, टीकापुर सरोकार समूह, रोटरी क्लव अफ न्युवर्क, एनआरएनए अन्तर्राष्ट्रिय समिती लगायतले सहयोग पुर्याएका थिए ।
मोबाइल ब्लड बस सुदुर पश्चिमका सबै जिल्लामा आवश्यकता अनुसार सञ्चालन गरिनेछ । आधुनिक प्रविधि सहितको बसबाट लामो दुरीका रक्त संकलन स्थलमा गएर बस भित्रै रक्तदान गर्ने, संकलन गर्ने र सुरक्षितरुपमा ब्लड बैंकसम्म ल्याउन सक्ने सुविधा उपलब्ध छ।
एनआरएनएले नेपालमा मानव कल्याणकारी योजना अन्तर्गत पहिलो घुम्ती रगत बस भरतपुर महानगरपालिका मार्फत् चितवन रेडक्रसलाई हस्तान्तरण गरिसकेको छ भने आगामी दिनमा सबै प्रदेशमा पुर्याउने लक्ष्य राखेको छ ।
समाचार 
