सत्ति / टीकापुर नगरपालिकालाई पूर्णखोप सुनिश्चितता पालिका घोषणा गरिएको छ । टीकापुरमा एक कार्यक्रम गरी नगर प्रमुख रामलाल डगौराले नगरपालिकालाई पूर्ण खोप सुनिश्चितता पालिका एवम् दीगोपना घोषणा गरेका हुन ।
घोषणा कार्यक्रममा उद्योग पर्यटन तथा वातावरण मन्त्री मानबहादुर धामीले कैलालीमा टीकापुर, भजनी, गौरीगंगा पालिका पुर्णखोप सुनिश्चित पालिका घोषणा भएका बताउँदै दीगो विकास लक्ष्य प्राप्तिका लागि गरेका कामको सराहना गरेका थिए ।
‘‘समयमै १५ महिनादेखि २३ महिनासम्मका बालबालिकालाई सबै खोप लगाउन पालिकाले गरेको कार्यले पुर्ण खोप सुनिश्चित पालिका घोषणा भएको छ’’, मन्त्री धामीले भने, ‘‘आउँदा दिनमा पनि निरन्तरता दिनुहोला । स्वास्थ्यमा पालिकाले गरेका कार्यले अन्य पालिकालाई पनि प्रेरणा मिल्नेछ ।’’
मन्त्री धामीले पूर्ण खोप घोषणा लगायतका कार्यका लागि प्रदेश सरकारले सक्दो सहयोग गर्ने बताए । कार्यक्रममा डब्लुएचओका डा. निमेश खतिवडाले टीकापुरले अब कोभिड १९ खोप पनि सबैलाई समयमै लगाएर पुर्ण खोप घोषणा गर्नेमा आशावादी रहेको बताए ।
टीकापुर अस्पताल व्यवस्थापन समितिका अध्यक्ष झपट सोडारीले टीकापुरका नागरिकलाई सहज स्वास्थ्य सेवाका लागि टीकापुर अस्पतालले पालिकासँग समन्वय गरेर सेवा दिइरहेको बताए । ‘‘हामीकहाँ हप्तामा दुई दिन खोप कार्यक्रम सञ्चालन हुन्छ, अस्पतालमा खोप सेवा लिनेको संख्या समेत धेरै छ’’, अध्यक्ष सोडारीले भने, ‘‘सहज सेवाका लागि काम गरिरहेका छौँ ।’’
कार्यक्रममा पूर्णखोप कार्यक्रममा सघाउने वडाध्यक्ष, स्वास्थ्य इञ्चार्ज, केही कर्मचारी, खोप कार्यकर्तालाई प्रमाणपत्र सहित सम्मान गरिएको थियो ।
समाचार 
