रसुवा / “वनको दिगो व्यवस्थापनको लागि सामुदायिक अधिकार, उद्यमशीलता र सशक्त संगठन समृद्धिको आधार” भन्ने नाराका साथ सामुदायिक वन उपभोक्ता समुहहरूको वार्षिक प्रतिवेदन तयारी तथा सुशासन अभिबृद्धिका लागि सहजिकरण तथा सचेतना कार्यक्रम फागुन १३ गते थाम्बुचेतमा सम्पन्न भयो । 
आमाछोदिङमो गाउँपालिका–५ चिलिमेमा भएको कार्यक्रममा सामुदायिक वन उपभोक्ता समुहहरू बिधी र नीति अनुसार समयमा बिधान तथा कार्य याेजना अनुरुप चल्नुपर्ने डिभिजनल वन अधिकृत प्रेमा थापाले बताउनुभयो । वनलाइ जीवन र जनजिविकासँग जोडेर आयमुलक काममा गर्नुपर्ने बताउँदै सवै उपभोक्ता समुहले समयमा वार्षिक प्रतिवेदन , साधारण सभा, लेखा परीक्षण र आयव्याय सार्वजनिक गर्नुपर्ने बताए । डिभिजन वन कार्यालय रसुवाको सहयोग तथा सामुदायिक वन उपभोक्ता महासंघ रसुवा र आमाछोदिङमो स्थानीय महासंघको समन्वयमा भएको छलफलमा सामुदायिक वन उपभोक्ता समुहको सुशासनका लागि समयमा प्रतिवेदन, वार्षिक साधारण सभा तथा लेखा परीक्षण समयमा हुनुपर्ने, समुहमा लेखा परीक्षणको महत्वलगायत विषयमा डिभिजनल वन अधिकृत प्रेमा थापा, सामुदायिक वन उपभोक्ता महासंघका हेमनाथ खतिवडा, दुकर तामाङ लगायतले आफ्नो धारणा राखेका थिए ।
समाचार 
