काठमाडौं /आफूलाई प्रहरी बताउने एक समूहले कञ्चनपुरबाट आइतबार साँझ एक नेपालीलाई बन्धक बनाएर भारत लगेको खुलेको छ । कञ्चनपुरको बेतकोट नगरपालिका–७ स्थित आफ्नो ससुरालीमा बस्दै आएका कैलालि जानकी गाउँपालिका–६ जगतपुरका मीनबहादुर शाहलाई बन्धक बनाएर भारत पुर्याइएको हो । उनलाई भारत लगे पनि सीमामा प्रहरीले समेत चाल पाएन । मीनबहादुर पछिल्लो एक महिनादेखि श्रीमती सहित कञ्चनपुरमा रहेको ससुरालीमा बस्दै आएका थिए । 
स्कुटरमा आएका दुईजनाले आफूहरु प्रहरी भएको र ‘काम छ’ भन्दै मीनबहादुरलाई लिएर गएका थिए । आफन्तले प्रहरी कार्यालयमा सम्पर्क गर्दा उनी त्यहाँ नभएको जानकारी पछि अनुसन्धान सुरु गरिएको हो ।
जिल्ला प्रहरी कार्यालय कञ्चनपुरका प्रहरी निरीक्षक लालबहादुर बमले घटनाबारे अनुसन्धान भैरहेको बताए । उनले भने, “नेपाल प्रहरीको कुनै टोलीले उनलाई लगेको होइन । उनलाई लैजाने को हुन् भन्नेबारे अनुसन्धान हुँदै छ ।”
प्रहरी अनुसन्धानका क्रममा बम कञ्चनपुरको सीमावर्ती भारतीय सहर बनबासामा प्रहरी हिरासतमा रहेको खुलेको छ । नेपाली नागरिक नेपालका सुरक्षा निकायको समन्वय बिना भारतीय प्रहरीको हात लाग्नु गम्भीर विषय भएको प्रहरीकै अधिकारी बताउँछन् ।
इन्सपेक्टर बलमे मीनबहादुरलाई कुन नाकाको प्रयोग गरेर भारत पुर्याइयो भन्नेबारे अनुसन्धान भइरहेको बताए ।
प्रहरीका अनुसार केही समयअघि मीनबहादुर दम्पती भारतको गुडगाउँमा बस्दै आएका थिए । उनीहरू त्यहाँ बस्दा एकघरमा लुटपाट भएको र सो लुटपाटमा मीनबहादुरको नाम समेत जोडिएकाले लगेको हुन सक्ने आशंका छ साभार : बाह्रखरि डटकम
समाचार 
