भीम सार्की र कुशल मल्लले अर्धशतक बनाएपछि नेपालले एसीसी प्रिमियर कप क्रिकेटमा मंगलबार मलेसियामाथि ६ विकेटको सहज जित हात पारेको छ । भीम र कुशलले चौथो विकेटमा १ सय १२ रनको साझेदारी गरेपछि नेपालले २ सय ३६ रनको लक्ष्य ३६.२ ओभरमै पूरा गरेको हो ।
भीमले ७१ रन बनाए । नेपाल विजय भन्दा ५ रनको नजिकको समयमा आउट भएका भीमले ९८ बल खेली ५ चौका प्रहार गरे ।
कुशलले अविजित ७० रन बनाए । उनले ४० बल खेली समान ५ चौका र छक्का प्रहार गरे । दीपेन्द्रसिंह ऐरी ३ बलमा ५ रन बनाई अविजित रहे ।
नेपालको सुरुआत भने राम्रो थिएन । आसिफ शेख पहिलो ओभरमै १ रनमा आउट भए । उनलाई मोहम्मद वाफिकले कट एन्ड बोल्ड गरे । कुशल भुर्तेल र भीमले दोस्रो विकेटमा ४८ रनको साझेदारी गरे । कुशलले ३१ बलमा ५ चौका र २ छक्कासहित ३८ रन बनाए ।
कप्तान रोहित पौडेलले पनि छिटो गतिमा रन बनाए । उनले ४३ बल खेली ५ चौकासहित ४२ रन बनाए । २२ औं ओभरमा उनले क्याच दिँदा नेपालको खातामा १ सय १९ रन थियो । त्यसपछि भीमले संयमित र कुशल मल्लले आक्रामक खेल्दै नेपाललाई विजयी बनाए ।
यसअघि कप्तान अहमद फैज र विरनदीप सिंहले सतकीय साझेदारी गरेपछि मलेसियाले नेपाललाई २ सय ३६ रनको लक्ष्य दिएको थियो । मलेसियाले तुलनात्मक रूपमा बलियो मानिएको नेपालविरुद्ध राम्रो स्कोर बनाएर चुनौती दिएको थियो ।
सेप्टेम्बरमा पाकिस्तानले आयोजना गर्ने एसिया कपको छनोटको आधार रहेको प्रतियोगिताको पहिलो खेलमा मलेसियाले त्रिवि क्रिकेट मैदान कीर्तिपुरमा टस जितेर पहिला ब्याटिङ गर्दै ९ विकेट गुमाई २ सय ३५ रन बनाएको थियो ।
कप्तान अहमद फैजले ७६ रन बनाए । उनले ९५ बल खेल्दै ८ चौका र १ छक्का प्रहार गरे । उनले विरनद्धिप सिंह दोस्रो विकेटमा १ सय १६ रनको साझेदारी गरे । विरनद्धिप भने अर्धशतक बनाउन चुके । उनले ९४ बल खेल्दै ४६ रन बनाउनेक्रममा २ चौका प्रहार गरे ।
मोहम्मद अमिरलाई १८ रनमा गुलशन झाले आउट गरेपछि फैज र विरनदीपको जोडी जमेको थियो । फैजलाई आउट गरेपछि नेपालले नियमीत जस्तो विकेट लिन सुरु गरेको थियो । विजय युनी १२ र सैयद अजिज १३ रनमा आउट भए । सोमपाल कामीले लगातार बलमा खिजार हायत र फिर्ती सामलाई आउट गरे । हायतले २५ बल खेली १ चौका र १ छक्कासहित २२ रन बनाए ।
नेपालबाट सोमपाल र सन्दीप लामिछानेले ३–३ विकेट लिए । सोमपालले ९ ओभरमा ४० र सन्दीपले १० ओभरमा ४८ रन खर्चे । ललित राजवंशीले १० ओभरमा ३४ रन खर्चेर २ विकेट लिए ।
साभार : कान्तिपुर
समाचार 
